ကျောက်ခဲနှစ်လုံးကို ငှက်တစ်ကောင်နဲ့ ...

(၁)
Two Stones with One Bird
By   Charles Bernstein

Re-
demption
comes
&
redemp-
tion
goes
but
trans-
ience
is
here
for-
ever.

Source: Poetry မဂ္ဂဇင်း ၊ ဇွန်လ ၂၀၀၈ခုနှစ်။

(၂)

ကျနော်တစ်ယောက် ဒီရက်ပိုင်း တနင်္ဂနွေနေ့များမှာ ကွန်ပြူတာဂိမ်းတို့ဖြင့်တော်တော် အလုပ်ရှုပ်နေရသည်။ ကျနော့် ကိုယ်ပိုင် စိတ်အခြေခံအရဆိုလျှင်ထိုဂိမ်းများနှင့် ကျနော်မှာ ဘယ်လိုမျှ အဆက်အစပ်ရှိစရာပင် မလိုပါ။
အင်တာနက်ပေါ်ရှိ ဂိမ်းစာမျက်နှာများကိုဝင်၊ အစမ်း ကစားကြည့်၊ သူငယ်တန်းအရွယ် ကလေးငယ်တစ်ယောက် ဥာဏ်ရည်ဖြင့် ကစား၍ ရနိုင်မည် ထင်ပါကဒေါင်းလုဒ်ဆွဲယူ၊ ကိုယ်ပိုင် ကွန်ပြူတာ၌ ဆေ့ဗ်လုပ်။ အတော် အလုပ် ရှုပ်ရသည်။ တစ်ခါတစ်ခါ လိုအပ်ပါက ကိုယ့်ထက် တတ်ကျွမ်းနားလည်သူ “လူငယ်လူကောင်း”အပေါင်းတို့အား ချော့မော့ ဆရာတင်ကာ ကိုယ် နားမလည် သည်တို့ကို မေးမြန်းသင်ယူရသေး၏။ 

adventure games၊ board games၊ card games၊ fighting games၊flying games၊ funny games၊ logic games၊ puzzle games၊ skill games၊shooting games၊ sport games၊ car games စသည့် ဂိမ်းပေါင်း
မြောက်များစွာနှင့် ကျနော် ရင်းနှီး ကျွမ်းဝင် ပတ်သက်နေရသည့် အဖြစ်။အဓိက တရားခံကတော့ ယခုအခါ အိမ်ထောင်ကျ တစ်အိုးတစ်အိမ်ထူထောင်နေပြီဖြစ်သည့် သမီးကြီး။ သူတို့က ခေတ်ပေါ် ကုန်ဈေးနှုန်းကို
လိုက်မီရန် တနင်္ဂနွေနေ့ ဈေးပိတ်ရက်မှာပင် အိမ်တွင် အေးအေးလူလူ အနားယူအပန်းမဖြေနိုင်ကြပဲ ပျံကျဈေး၌ ဆိုင်ခင်းထွက်ကြရသည်။ဤသို့ဖြင့်သူ့သား၊ကျနော့်မြေး(မျောက်လောင်းအကျော်မြေးတော်မောင်)ကိုထိမ်းကျောင်းရန်
တာဝန်မှာကျနော့် ပုခုံးပေါ်သို့ တည့်တည့် မတ်မတ်ပင် ဆိုက်ရောက်လာတော့ပေသည်။ 

ဒီကလေးကလည်း သူ့အိမ်တွင် ဘယ်လိုပင်နေရသည်ဖြစ်စေ၊ကျနော့်အိမ်ရောက်ပြီဆိုလျှင်တော့ အကဲတကာ့ ထိပ်ခေါင်၊ အဆော့အရာတွင်ပြိုင်စံရှား။ တစ်ချက်ကလေးမျှ ငြိမ်ငြိမ်ထိုင်မနေတတ်သည့် ကလေးစားမျိုး။
အာဂ အကဲဝိဇ္ဖာကလေး။ သူ့အိမ်၌ မိခင်၏ တင်းကြပ်သော စည်းမျဉ်း၊စည်းကမ်းပေါင်း သောင်းခြောက်ထောင်အောက်မှာ ငြိမ်ဝပ် ပိပိပြားပြားရှိနေတတ်လည်း ကျနော့်အိမ်တွင် အတိုး၊ အရင်းပေါင်း၍ အကြီးအကျယ်သောင်းကျန်း ဆိုးသွမ်းနေ တော့၏။ကျနော်၏ ကြင်ယာ ချစ်ဇနီးကိုယ်တိုင်မှာလည်း ခွဲစိတ်ကုသခံထားရသောခြေထောက်ကြောင့် မြေးတော်မောင်ကို လိုက်မဆွဲနိုင်သဖြင့် ထိုမျောက်သား
ပေါက်အား ကျနော်ကိုယ်တိုင် ကွန်ပြူတာရှေ့ ဆွဲခေါ်ထားပြီး ကွန်ပြူတာဇာတ်သွင်းထားလိုက်ရသည်။ ပထမဦးဆုံးကတော့ webpages များတွင် လွယ် လင့်တကူဝင်ရောက် ရှာဖွေဖတ်ရှုနိုင်သော Kid English သင်ခန်းစာများ။ အင်တာနက်ဆက်သွယ်မှုကလည်း ကမ္ဘာ့စံချိန် ချိုးလောက်အောင် နှေးကွေး လေးလံ
လွန်းလှသဖြင့် ဤနည်းမှာ ကလေးတစ်ယောက်ကို ငြိမ်ဆေး မကျွေးနိုင်ကြောင်းကျနော်ကိုယ်တိုင် လက်တွေ့ စမ်းသပ် သိရှိလာသောအခါ online language gamesများဆီသို့ ခြေဦး လှည့်ကြည့်သည်။ ဒါကလည်း ပထမနည်းအတိုင်းပင် အဆင်မပြေပါ။နောက်ဆုံး ဂိမ်းပေါင်းများစွာကို မြေး တော်မောင်နှင့်အတူ ကစား
ဖြစ်သွားမိသည်။ ဤသို့ဖြင့် ကျနော်တို့ မြေးအဘိုးနှစ်ယောက်ကွန်ပြူတာဂိမ်းမှာ ဘုံရပ်တည်မှုတစ်ရပ် တည်ဆောက်ဖြစ် သွားမိလေသည်။ထောင်သောင်းမက များပြား ပွေလီလှသည့် ဂိမ်းပေါင်းများစွာအနက်
မြေးတော်မောင်က shooting games များကိုသာ ပိုမို နှစ်သက် ခုံမင်သည်။Plants & Zombies နှင့် Angry Birds ဂိမ်းတို့မှာ သူ၏ ဖေးဖရိတ်ဂိမ်းများဖြစ်လာ၏။ အထူးသဖြင့် အချုပ်အနှောင်ခံနေရသည့် လှောင်ချိုင့်များထဲက
ငှက်များ လွတ် မြောက်အောင် ငှက်ခေါင်းပြတ်များဖြင့် ပစ်ခတ် ကယ်တင်ရသောAngry Birds ဂိမ်းကို သူပို၍ သဘောကျ နှစ်ခြိုက်၏။တိုက်ရိုက်ပစ်ခတ်ရသည်လည်း ရှိ သည်။ တစ်ဆင့်ခံ ပစ်ခတ်ရသည်လည်း ရှိသည်။
အထူးသဖြင့် TNT ယမ်းပုံးများကို ထိအောင်ပစ်ခတ်ကာ ပေါက်ကွဲစေပြီးငှက်လှောင်အိမ်များ ကျိုးပဲ့ ပျက် စီးသွားအောင်လည်း လုပ်၍ရသည်။ငှက်အကောင်လိုက်ဖြင့် ကျောက်ခဲများ ပြိုကျအောင် ပစ်ခတ်ကာ
ငှက်လှောင်အိမ်များကို ဖျက်ဆီးသည့် ဂိမ်းပရိုဂရမ် တစ်ခုကို ကျနော်တို့မြေးအဘိုး ၀င်ရောက် ကစားမိသောအခါ လွန်ခဲ့သည့် သုံးနှစ်ခန့်က Poetryမဂ္ဂဇင်းတွင် ကျနော် အမှတ်တမဲ့ ဖတ်ရှုခဲ့ရသည့် က ဗျာ တစ်ပုဒ်အား ဖျတ်ကနဲ
သတိရသွားမိ၏။ 

“ကျောက်ခဲနှစ်လုံးကို ငှက်တစ်ကောင်နဲ့...။” 

ထင်ရှားကျော်ကြားသည့် L= A =N = G= U= A= G= E ကဗျာ ဆရာ ချားလ်စ် ဘန်းစတိုင်းရဲ့ကဗျာတစ်ပုဒ်။

(၃)

ကျောက်ခဲနှစ်လုံးကို ငှက်တစ်ကောင်နဲ့...

သိတ်
ခါ အဖတ်ဆယ်တာတွေ
လာ
ပြီး
သိက္ခာ အ
ဖတ်ဆယ်တာတွေ
သွားကြ
ဒါပေမယ့်
နေ့မြင် ည
ပျောက် တရား
ရှိနေပြီ
ဒီမှာ
အမြဲ
တမ်း ။

ကဗျာက ဒီလောက်ပါ။ အနောက်တိုင်း ကဗျာတွေ ကျိုးတိကျိုးကျဲလောက်ဖတ်ဖူးကြသူတွေတောင်မှ  ချားလ်စ် ဘန်းစတိုင်း ကဗျာကို ဖတ်ပြီးတာနှင့် တစ်ပြိုင်နက် ဤကဗျာသည် For men may come and men may go, / But I go on forever ဆိုတဲ့ Alfred Lord Tennyson ရဲ့ ကမ္ဘာကျော် နိဗ္ဗိန္ဒ တေး သွားလင်္ကာThe Brook ကို မျက်စေ့ထဲ ပြေးပြီး မြင်ယောင်ကြမှာ အမှန်ပါ။ ၂၀ရာစု အကုန်ပိုင်းလောက်ကတောင် ဒီကဗျာကို တက္ကသိုလ်ဝင်တန်း ပင်ရင်း အင်္ဂလိပ်စာမှာထည့်သွင်း ပြဌာန်းခဲ့သေးသည်။ ထို The Brook ကဗျာကို ချားလ်စ် ဘန်းစတိုင်း
ကဗျာဖြင့် နှိုင်းယှဉ် ကြည့်လိုက်လျှင်ပင် လန်းဂွစ်ဂ်ျ ကဗျာဖွဲ့စည်းပုံကို အကြမ်းဖျင်း မြည်းစမ်း ရိပ်စားခြုံငုံနိုင်လိမ့်မည်
ထင်ပါသည်။အင်္ဂလိပ် ဘာသာစကား အသုံးအနှုံးတွင် 'to kill two birds with one stone' ဟုidiom အဆိုတစ်ရပ် ရှိသည်။ မြန်မာစာ အသုံးက “တစ်ချက်ခုတ် နှစ် ချက်ပြတ်”ဆိုသလို စကား ပရိယာယ်မျိုး။ အား ၀ါယမ သိတ်ပြီး မစိုက်ရပဲ တစ်ခုခုကိုအလွယ်တကူ ပြီးမြောက်သည့် အဖြစ်ကို ခိုင်းနှိုင်း သုံးစွဲမှု။ သို့တည်းမဟုတ် စိုက်ထုတ်မှုတစ်ရပ်တည်းဖြင့် ပြဿနာနှစ်ရပ် တစ်ပြိုင်တည်းဖြေရှင်း ဆောင်ရွက်နိုင်သည့် အဖြစ်ကို ရည်ညွှန်း သုံးစွဲသည်။ယခု 'Two stones with one bird ' ကမူ ဆန့်ကျင်ဘက် အဓိပ္ပါယ်ဆောင်လိမ့်မည်
ထင်ရပါသည်။ online dictionary တစ်ခု ဖြစ်သည့် urban dictionary ကတော့ 'killing two stones with one bird ' ဟူသော စကားပိုဒ်ကို “လုပ်ဆောင်ဖြည့်ဆီး ဆောင်ရွက်ရန် မဖြစ်နိုင်သည့် အလုပ်မျိုးကို အချိန်ပေါင်းများစွာ၊ ၀ါယမ စိုက်ထုတ်မှုပေါင်းများစွာ အဆုံးရှုံးခံ၍နည်းလမ်း အသွယ်သွယ်ဖြင့် ပေါက်မြောက်အောင် ဆောင်ရွက်ခြင်း”ဟု အနက်ပေးထားသည်ကို ဖတ်ရှုရပါသည်။ မြန်မာလူမျိုးတစ်ချို့ ပြောလေ့ဆိုထရှိသည့် “နံရံကိုခေါင်းနဲ့တိုက်” ဆိုသည့် စကား အသုံးအနှုံးလိုမျိုး။

(၄)

ကွန်ပြူတာ keyboard ပေါ်က ၀င်းဒိုး အိုင်ကွန် ခလုတ်ကို ဘယ်လက်ညှိုးဖြင့်ဆတ်ကနဲ ဖိနှိပ်လိုက်သည်။ window page က လေးတိလေးတွဲ့ဖြင့် တစ်ဖြည်းဖြည်းပေါ်လာသည်။ မျက်နှာချင်းဆိုင် ကွန်ပြူတာ မှန်သားပြင် ဘယ်ဘက်
အလယ်လောက်တွင် ကျနော် လွန်ခဲ့တဲ့ ရက်သတ္တပတ်က install လုပ် ထားသည့် AngryBirds အိုင်ကွန်ကို ကျနော့် မြေးက မျက်လုံးတောက်တောက်ဖြင့်ငေးစိုက်ကြည့်နေ၏။ left click တစ်ချက် ထပ်ပေးလိုက်သောအခါ loading... ဟုစာသားအတို တစ်လုံး ပေါ်လာသည်။ ဂိမ်းစာမျက်နှာပေါ်က start အိုင်ကွန်ပေါ်ကျနော် နောက်ထပ် တစ်ကြိမ် left click တစ်ချက်ပေး လိုက်သောအခါကျမှမြေးတော်မောင် မျှော်လင့် စောင့်စားနေသည့် ဂိမ်းစာမျက်နှာက ကွန်ပြူတာ
မှန်သားပြင်ပေါ် တက်လာ၏။ ကျနော့် မြေးအတွက် “ဒေါ သအိုး ငှက်များ“ ဂိမ်းကအဆင်သင့် ဖြစ်ပြီ။

လက်ရှိ ကစားမည့် ဂိမ်းအတွက် ညာဘက်ခြမ်းတွင် သုတ်သင် သတ်ဖြတ်ရမည့်ပစ်မှတ်က မျောက် ၁၂ ကောင်။ သူတို့က အကာအကွယ်ကောင်းကောင်းယူထားနှင့်ပြီးသား။ ရေခဲချပ်တွေ၊ ကျောက်ပြားတွေ၊ သစ်သား ဒေါက်တိုင်တွေ။မျောက်တွေ ခိုအောင်းရာအပေါ်တည့်တည့် သစ်သားနှင့် ကျောက်ပြားခင်းစင်ပေါ်တွင် ကျောက်ခဲတစ်ချို့။ နှစ်လုံး တစ်စင်။ သုံးလုံး၊ လေးလုံးတစ်စင်။ မျောက်တွေကို တည့်တည့် မှန်အောင် ပစ်နိုင်လျှင်ပစ်၊ သို့မဟုတ်ကျောက်ခဲ များ ပြိုကျသွားအောင် ပစ်ချနိုင်မှ ထိုမျောက်တွေ ကွန်ပြူတာ
မှန်သားပြင်ထက်မှ ပျောက်ကွယ်သွားအောင် လုပ်ဆောင်နိုင်ပေလိမ့်မည်။ ယခင်ကစားနေ ကျ ဂိမ်း level အဟောင်းတုန်းက လှောင်ချိုင့်ထဲမှာ ငှက်အရှင်တွေ။အခုတော့ ပြောင်တိ ပြောင်စပ် မျက်နှာပေးဖြင့် မျောက် ၁၂ ကောင်။ ပစ်မှတ်ပြောင်း သွားသော်လည်း ဂိမ်းအခြေခံ သဘောမှာ တစ်ထပ်တည်း။ ထိုမျောက် ၁၂
ကောင်စလုံး အပြတ်ရှင်းနိုင်လျှင် ဂိမ်းတစ်ဆင့် အောင်မြင်ပေလိမ့်မည်။ဘယ်ဘက် player ဘက်ခြမ်း၌ သားရေခွတစ်လက်။ ကျည်ဆံ လောက်စာအဖြစ် အသုံးပြုပစ်ခတ်ရမည်ကတော့ စိမ်းပြာရောင် ချိုးငှက်တစ်ကောင်၊ အ ရွယ်အစား ငယ်ငယ်ငှက်ခေါင်းပြတ် အပြာ ၂၊ တြိဂံပုံ ငှက်ခေါင်းပြတ် အ၀ါ ၂၊ ပင်ဂွင်းငှက်နှင့် ခပ်ဆင်ဆင် နောက်ထပ် အမည်းရောင် ငှက်ငယ်တစ် ကောင်။ဂိမ်းစာမျက်နှာ လုဒ်ဒင် ပြီးသွားသည်နှင့် တစ်ပြိုင်နက် သားရေခွ
လောက်စာအိမ်တွင်းသို့ စိမ်းပြာရောင် ချိုးငှက်က သူ့ဖာသာသူ အလိုအ လျှောက်ခုန်တက်လာ၏။ မြေးတော်မောင်က ကျောက်ခဲနှစ်လုံးတင်ထားသော စင်ဆီသို့ငှက်လောက်စာလုံးဖြင့် မောက်စ်ကို ခတ်ဖော့ဖော့ ဆွဲလိုက်ပြီးချိန်ရွယ်လိုက်၏။ စင်အောက်တည့်တည့်က မျောက်သုံးကောင်မှာ စင်ကိုမော့ကြည့်နေလျှက် ဂနာမငြိမ်ဖြစ်နေပုံရသည်။ မြေးသည် ကျနော့် ပေါင်ပေါ်မှာထိုင်နေရင်းက ကျနော့်ကို တစ်ချက် လှမ်းကြည့်လိုက်ပြီး မောက်စ်ကိုခတ်ဆတ်ဆတ်ဆွဲ၍ လွှတ်ထည့်လိုက်သည်။ စိမ်းပြာရောင် ချိုးငှက်က လေးလေးကန်ကန်ဖြင့် ကျောက်ခဲ နှစ်လုံးရှိရာသို့ parabolaမျဉ်းကွေးလမ်းကြောင်းအတိုင်း ပျံတက်သွားသည်။ အောက်ကမျောက်သုံးကောင်မှာကား မျက်လုံး ပေ ကလတ်၊ ပေကလတ်ဖြင့် လှုပ်လှုပ်ရွရွ။ကျောက်ခဲနှစ်လုံးကို ငှက်တစ်ကောင်ဖြင့်...။

သိတ်ခါ/ သိက္ခာ အဖတ်ဆယ်တာတွေ..။ ၀င်လာကြ၊ ထွက်သွားကြသနဲ့..။ နေ့မြင်ညပျောက် မမြဲသော တရားက ကောင်းကင်တွင် ရွာချတော့မည့် မိုးလို ခတ်ညို့ညို့မှိုင်းနေဆဲ။ ကျနော်တို့ရဲ့အသံတိတ်ရုပ်ရှင်ဇာတ်ကားထဲကလို အတိတ်ကာလတွေ။ကျနော်တို့ ရှေ့တည့်တည့်က ပစ္စုပ္ပန် အုံ့အုံ့ဆိုင်းဆိုင်း တွေ။ ကျနော်တို့အမတိ အမတန် ကံကြီးလွန်းမှ ဆုံနိုင်ကောင်း ဆုံနိုင်မည်ဖြစ်သည့်၊ကျနော့်ရဲ့ မြေးတော်မောင်တို့ရဲ့ ရွှေရောင် လင်းလက်တော့မည်ဟု
မျှော်လင့်စရာ အနာဂတ် ကာလများ...။

သစ်စိုး
မတ် ၁၅ ၊ ၂၀၁၂ ခုနှစ်။