အပြင်ကိုငေး ဆက်တွေးနေတယ်
ဒီနေ့သတ်မှတ်ချက်ကို
မနက်ဖြန်ရွေ့လာမယ့် အမှတ်အသားရက်စွဲများအပေါ်တစ်ခုခု
လစ်ဟာဆုံးရှုံးမှုလို့ တံဆိပ်ကပ်ထားလိုက်ရုံပေါ့
သစ်သားထဲ သံကိုတဖြည်းဖြည်းရိုက်သွင်းနေသလို
တစ်ကိုယ်ရည်တစ်ကာယ အိပ်ရာလေးအပေါ်
တစ်အိအိကျွံဝင်သွားတော့မလို
အမှန်တစ်ကယ်လေးပင်လာသော ဘဝဝန်ကို ထမ်းပိုးနေရပါတယ်
စိတ်ပျက်သွားပြီလား
ခေါင်းစဉ်အတည်တကျမရှိတဲ့ ရယ်သံလေးကို သတိရနေသေးလား
အမှတ်မရှိတဲ့အတွေးကို ရေဆေးလိုက်ရင်ကောင်းမလား
ဦးခေါင်းထဲ တစ်စစပြည့်လာနေတဲ့ အမှိုက်များ
အဆုပ်ထဲ တစ်စစပြည့်လာနေတဲ့ အခိုးအငွေ့များ
နှလုံးသားထဲ တစ်စစပြည့်လာနေတဲ့ အလိုရမ္မက်များ
ကြားနေ၊ မြင်နေ၊ ထိတွေ့နေ့ရပါတယ်
တစ်ချိန်လုံးပြေးနေရတယ် တစ်ချိန်လုံးရပ်နေရတယ်
အလေးချိန်မပြည့်မီ တော့သလို တစ်စစစိတ်ပျက်ဆုတ်လျော့နေရပါတယ်
တစ္ဆေတစ်ကောင်ပမာ မကျွတ်မလွတ်နိုင်တဲ့ စွဲလမ်းမှုမျိုးနဲ့
အရင်တစ်ချိန်တုန်းက ဒီနေရာလေးမှာ ပျော်ရွှင်မှုအတိ ဖုံးလွှမ်းခဲ့ဘူးတာပေါ့။ ။
အောင်ပိုင်စိုး
၂၁-၇-၀၉
အင်္ဂါ
No comments:
Post a Comment